Estado

O Estado é un concepto político que se refire a unha forma de organización social soberana e coercitiva, formada por un conxunto de institucións involuntarias, que teñen o poder de regulamentar a vida nun territorio determinado.

O concepto de Estado

O concepto de Estado difire segundo os autores, pero algúns deles definen o Estado como o conxunto de institucións que teñen a autoridade e potestade de establecer normas xurídicas que rexen a sociedade, tendo soberanía interna e externa sobre un territorio determinado. Max Weber, no 1919, definiu o Estado como unha unidade de carácter institucional que no interior dun territorio monopoliza para si o emprego da forza legal. Por iso, atópanse dentro do Estado institucións coma as forzas armadas, a administración pública, os tribunais e a policía, asumindo pois o Estado as funcións de defensa, goberno, xustiza, seguridade e relacións exteriores.

Probablemente a definición máis clásica de Estado foi a citada polo xurista alemán Hermann Heller, quen definiu o Estado como unha unidade de denominación, independente no exterior e no interior, que actúa de xeito continuo, con métodos de poder propios e claramente delimitado no persoal e territorial. Ademais, o autor engade que só se pode falar de Estado como unha construción propias das monarquías absolutas do século XV, durante a Idade Moderna. "Non hai Estado na Idade Antiga", sinala o recoñecido autor.

Así mesmo, como evolución do concepto desenvolveuse o "Estado de Dereito" polo que se inclúen dentro da organización estatal aqueles resultantes do imperio da lei e da separación de poderes (executivo, lexislativo e xudicial) e outras funcións propias do Estado como a emisión de moeda propia.

Conceptos similares

• Non debe confundirse co concepto de goberno, que sería só a parte xeralmente encargada de levar a cabo as funcións do Estado delegando noutras institucións as súas capacidades. O Goberno tamén pode ser considerado como o conxunto de gobernantes que, temporalmente, exercen cargos durante un período limitado dentro do conxunto do Estado.
• Tampouco equivale totalmente ao concepto, de carácter máis ideolóxico, de "Nación", posto que se considera posible a existencia de nacións sen Estado e a posibilidade de que diferentes nacións ou nacionalidades estean agrupadas en torno a un só Estado. Comunmente os Estados forman entes denominados "Estado Nación" que aúnan ambos os conceptos, sendo habitual que cada nación posúa ou reivindique o seu propio Estado.

Existen distintas formas de organización dun Estado, podendo abarcar desde concepcións "centralistas" ás "federalistas" ou as "autonomistas", nas que o Estado permite ás federacións, rexións ou a outras organizacións menores ó Estado, o exercicio de competencias que lle son propias pero formando un único Estado; é o que sucede por exemplo en España, en Alemaña ou nos Estados Unidos.

Recoñecemento dos Estados

O recoñecemento é un acto discrecional da predisposición dos suxeitos preexistentes. Este acto ten efectos xurídicos, sendo considerados ambos suxeitos internacionais, o recoñecedor e o recoñecido, de igual a igual posto que se crea un vínculo entre os dous.

Hoxe en día a doutrina aceptada para o recoñecemento dos Estados é a doutrina Estrada, pragmática en tanto en canto un suxeito non sexa molesto para a sociedade internacional non vai ter dificultade para ser recoñecido. Enténdese que se un suxeito recoñece a outro vanse producir contactos entre ambos, polo que no momento no que se inician os trámites para o establecemento de relacións diplomáticas suponse que existe un recoñecemento internacional mutuo. Porén, a ruptura destas relacións diplomáticas non supón a perda do recoñecemento. Igualmente, unha simple declaración formal tamén é válida para recoñecer a outro Estado sen iniciar relacións diplomáticas.